AMAKHOSI AHLANGANE NOMPHATHI OMUSHA WESIMANGALISO
22 September 2023
Umphathi omusha weSimangaliso Wetland Park Authority uMnu. S. Bukhosini usanda kuhlangana
naMakhosi emhlanganweni obubanjelwe eHluhluwe.
uNgqongqoshe womnyango wezamahlathi, ukudoba kanye nemvelo uNks. Barbara Creecy uphinde
waqoka uMnu. Bukhosini njengomphathi omkhulu weSimangaliso kulandela iziphakamiso ezenziwe
iBhodi leSimangaliso. Usihlalo weBhodi iNkosi Tembe yethule ngokusemthethweni uMnu. Bukhosini
eMakhosini njengomphathi omkhulu weSimangaliso Wetland Park Authority. Amakhosi akushayele
ihlombe ukuqokwa okwesibili kukaBukhosini. uMnu. Bukhosini wabe eseba nesethulo eMakhosini
mayelana nokwenziwe iSimangaliso emiphakathini yaMakhosi kule minyaka emihlanu edlule. Ubalule
izinto ezimqoka ezizuzwe ngehlandla lakhe lokugcina, okufaka phakathi ukunwetshwa kwendawo
evikelwe olwandle, ukuthuthukisa ingqalasizinda, ukuthuthukisa ubudlelwane nababambe iqhaza
eSimangaliso kanye nokudala amathuba emisebenzi.
uMnu. Bukhosini wakhombisa intshisekelo yokuqhubeka nokuthuthukisa ubudlelwane naMakhosi
ngoba phambilini, iSimangaliso sasingathandeki emiphakathini ngenxa yokunganeliseki okwakuvela
emiphakathini kanye nobuholi bomdabu mayelana nepaki; ikakhulukazi ngoba umphakathi bekubukeka
sengathi ukhishwa ngaphandle ungabi nazwi uma kuthathwa izinqumo mayelana nokuphathwa
kwepaki. iSimangaliso singaphansi komasipala wesifunda uMkhanyakude, onke aMakhosi
aseMkhanyakude ayingxenye yale-forum. UBukhosini wacela Amakhosi ukuthi abe nesandla
ekusebenzeni kweBhodi leSimangaliso, ngoba ukholwa ukuthi lokho kungathela izithelo ezinhle.
Njengenxenye yokuthuthukisa ubudlelwane naMakhosi, aMakhosi anegunya lokungena mahala epaki,
awakhokhi. iSimangaliso sizoqhubeka nokusebenzisana naMakhosi.
Umphathi omkhulu weSimangaliso waphinde wadalula eMakhosini ukuthi iSimangaliso sithole umbiko
ongenagcobho kumcwaningi mabhuku waseNingizimu Afrika; waqhubeka wabika ukuthi engxenyeni
yepaki eseMkuze sekufakwe iZingulule, lokho kuyimizamo yokuthuthukisa ukongiwa kwemvelo kanye
nezokuvakasha epaki. Yize kunjalo, Amakhosi afaka isicelo kumphathi omkhulu weSimangaliso, acela
ukuthi iSimangaliso siqhubeke nokusebenzisana no Myango wezokubusa ngokubambisana nezindaba
zomdabu(COGTA) ekuhleleni imihlangano kodwa kwengezwe izinsuku umhlangano ubanjwe izinsuku
ezimbili ukuze kuzoba nesikhathi esanele sokudingida izingxoxo, ikakhulukazi ezokuthi umphakathi ube
nezwi ekuphathweni kwepaki. Umphathi weSimangaliso wasimukela ngezandla ezimhlophe leso sicelo,
aMakhosi akushayela ihlombe ukwamukelwa kwesicelo sawo. “Ngiyaqonda ukuthi ukuphatheka kahle
kwepaki kuncike kakhulu kubudlelwano obuhle esinabo nemiphakathi” kusho uMnu. Bukhosini.
End
Statement issued by iSimangaliso Wetland Park Authority
Media enquires:
Mr. Bheki Manzini
Call/WhatsApp: 060 533 2082
Email: This email address is being protected from spambots. You need JavaScript enabled to view it.